പാര്ശ്വവല്കൃത സമൂഹത്തിന്റെ വിദ്യാഭ്യാസ പുരോഗതി ലക്ഷ്യമിട്ടുള്ള സമഗ്ര ശിക്ഷാ കേരളയുടെ ഒന്നാണ് നമ്മള് മന്ത്രി വി.ശിവന്കുട്ടി ഉദ്ഘാടനം ചെയ്തു
തിരുവനന്തപുരം : പൊതുവിദ്യാഭ്യാസ വകുപ്പിന്റെ ആഭിമുഖ്യത്തില് സംസ്ഥാനത്തെ അതിഥി തൊഴിലാളി വിഭാഗത്തിന്റെ മക്കളുടെയും, ആദിവാസി-ഗോത്ര മേഖലകളിലെ കുട്ടികളുടെയും വിദ്യാഭ്യാസ പുരോഗതി ലക്ഷ്യമിടുന്ന 'ഒന്നാണ് നമ്മള്' പരിപാടി പൊതുവിദ്യാഭ്യാസ-തൊഴില് വകുപ്പ് മന്ത്രി വി.ശിവന്കുട്ടി ഉദ്ഘാടനം ചെയ്തു. ഒരു കുട്ടിക്കും പഠനം നഷ്ടമാകരുത് എന്ന സര്ക്കാര് കാഴ്ചപ്പാടിന്റെ അടിസ്ഥാനത്തില് പാര്ശ്വവല്കൃത സമൂഹത്തിന്റെ ഉന്നമനത്തിനായി സമഗ്രശിക്ഷാ കേരളം നടപ്പിലാക്കുന്ന പദ്ധതിയാണിതെന്ന് മന്ത്രി പറഞ്ഞു. കോവിഡ് രണ്ടാം തരംഗം പിടിമുറുക്കിയ പശ്ചാത്തലത്തില് ഈ അധ്യയന കാലവും വീടുകളില് തന്നെ പഠനം നടത്തേണ്ട സാഹചര്യമാണ് നിലവിലുള്ളത്. ഇന്റര്നെറ്റ് ഇലക്ട്രോണിക് പഠനോപകരണങ്ങള് മുതലായവ ഇവര്ക്ക് കൃത്യതയോടെയും, ഫലപ്രദമായും ലഭ്യമാക്കുക വഴി ഓണ്ലൈന് ക്ലാസുകള് മുടക്കമില്ലാതെ ലഭിക്കുന്നതിനും പിന്തുണയ്ക്കായി നവമാധ്യമ കൂട്ടായ്മയ്ക്കു രൂപം നല്കി അധിക പഠന സാഹചര്യമൊരുക്കുക എന്നതാണ് ഈ പദ്ധതിയുടെ പ്രധാന ലക്ഷ്യം. പാഠഭാഗങ്ങള്ക്കപ്പുറം ഇവരുടെ തനത് കലകള്, കഥകള്, പാട്ട്, നാടകം, സാഹിത്യം, സാങ്കേതിക വിദ്യ എന്നിവ ഉള്പ്പെടുത്തിയ പരിപാടികളും, വിദഗ്ധരുമായുള്ള ആശയവിനിമയവും ഒന്നാണ് നമ്മളുടെ പ്രത്യേകതകളാണ്. ആദിവാസി ഗോത്ര സമൂഹം അധിവസിക്കുന്ന ജില്ലകളിലും അതിഥി തൊഴിലാളികള് അധിവസിക്കുന്ന ജില്ലകളിലുമായിട്ടാണ് പദ്ധതി നടപ്പിലാക്കുന്നത് എന്ന് സമഗ്ര ശിക്ഷാ കേരളം പ്രോജക്ട് ഡയറക്ടര് ഡോ.എ.പി. കുട്ടിക്കൃഷ്ണന് ആമുഖ പദ്ധതി അവതരണത്തില് പറഞ്ഞു. ഓണ്ലൈനായി നടന്ന യോഗത്തില് സംസ്ഥാന പ്രോഗ്രാം ഓഫീസറായ സിന്ധു.എസ്.എസ്. സ്വാഗതം പറഞ്ഞു. ജില്ലാ പ്രോജക്ട് കോ-ഓര്ഡിനേറ്റര്മാര്, പ്രോഗ്രാം ഓഫീസര്മാര് തുടങ്ങിയവര് പങ്കെടുത്തു.