സി.രാധാകൃഷ്ണൻ നായർ അധ്യാപന ജീവിതത്തിൽ നിന്നും വിരമിക്കുന്നു
തിരുവനന്തപുരം - സമഗ്ര ശിക്ഷ കേരളം സംസ്ഥാന പ്രോഗ്രാം ഓഫീസർ സി .രാധാകൃഷ്ണൻ നായർ 34 വർഷത്തെ ഔദ്യോഗിക അധ്യാപന ജീവിതത്തിൽ നിന്നും വിരമിക്കുന്നു. പ്രൈമറി അധ്യാപകനായും ഹൈസ്കൂൾ - ഹയർ സെക്കണ്ടറി അദ്ധ്യാപകനായും പ്രവർത്തിച്ചു. സമഗ്ര ശിക്ഷ കേരളം,സംസ്ഥാനത്ത് നടപ്പിലാക്കിവരുന്ന ഹലോ ഇംഗ്ലീഷ് പദ്ധതിയുടെ ചുമതല, പിന്നാക്ക വിഭാഗം കുട്ടികളുടെ പഠന മികവിനായി നടപ്പിലാക്കി വരുന്ന പ്രാദേശിക പ്രതിഭ കേന്ദ്രങ്ങൾ, ഊരുവിദ്യാകേന്ദ്രങ്ങൾ തുടങ്ങിയവയുടെ ചുമതലയും നിർവഹിച്ചിരുന്നു. പൊതുവിദ്യാലയങ്ങളിലെ കുട്ടികളുടെ ഇംഗ്ലീഷ് ഭാഷാ പഠനം മെച്ചപ്പെടുത്തുന്നതിനു വേണ്ടി ഹലോഇംഗ്ലീഷ് പരിപാടിയിലൂടെ നിരവധി പരിശീലന പദ്ധതികൾ ആവിഷ്കരിച്ച് നടപ്പിലാക്കുന്നതിന് നേതൃത്വം നൽകി. സംസ്ഥാനത്ത് നടപ്പിലാക്കിയ വിവിധ പാഠ്യപദ്ധതി പരിഷ്കരണങ്ങളിൽ പങ്കാളിയായിരുന്നു. സംസ്ഥാനതല റിസോഴ്സ് ഗ്രൂപ്പിൽ മുൻ അംഗവും ആയിരുന്നു. വിവിധ പാഠപുസ്തകങ്ങളിൽ ഇംഗ്ലീഷ് രചനകൾ നിർവഹിച്ചിട്ടുണ്ട്. നെടുമങ്ങാട് പനവൂർ സ്വദേശിയാണ്.