(എറണാകുളം) കവളങ്ങാട്

പല്ലാരിമംഗലം ഗവ. വൊക്കേഷണൽ ഹയർ സെക്കൻഡറി സ്‌കൂളിൽ പ്രവേശനോത്സവ ദിനത്തിൽ ആവേശമായി അതിഥിത്തൊഴിലാളികളുടെ മക്കളും. ബിഹാർ ചെംപാറൺ മോത്തീഹാറീ സ്വദേശികളായ ജാഫിർഹഖിന്റെയും നജ്മ ഖാത്തൂണിന്റെയും രണ്ടാമത്തെ മകൻ മുഹമ്മദാണ് എൽകെജിയിൽ പ്രവേശനം നേടിയത്. മൂത്തകുട്ടി ഫാത്തിമ ജന്നത്ത് ഒന്നാംക്ലാസിൽ പഠിക്കുന്നു. ഒമ്പതുവർഷമായി കേരളത്തിൽ ജോലി ചെയ്യുന്ന ദമ്പതികളും മക്കളും മലയാളം നന്നായി സംസാരിക്കും. ഇളയ കുട്ടി മൂന്നുവയസ്സുള്ള അബ്ദുല്ലയും പ്രവേശനോത്സവത്തിനെത്തിയിരുന്നു. സ്‌കൂളിൽ ഇരുപത്തഞ്ചോളം അതിഥിത്തൊഴിലാളികളുടെ മക്കൾ പഠിക്കുന്നുണ്ട്.