കണ്ടൽവനങ്ങൾ മാനവരാശിയുടെ സംരക്ഷകർ ; ജൂലൈ 26 അന്താരാഷ്ട്ര കണ്ടൽ സംരക്ഷണ ദിനം
എറണാകുളം : സമഗ്ര ശിക്ഷാ കേരളം എറണാകുളം ജില്ലാ പ്രോജക്റ്റിന്റെ നേതൃത്വത്തിൽ ജൂലൈ 26 അന്താരാഷ്ട്ര കണ്ടൽ ആവാസ വ്യവസ്ഥ സംരക്ഷണദിനം ആചരിച്ചു. കണ്ടൽക്കാടുകളുടെ സവിശേഷവും അതുല്യവുമായ ആവാസ വ്യവസ്ഥ സംരക്ഷിക്കേണ്ടതിന്റെ ആവശ്യകത പൊതുസമൂഹത്തെ ബോധ്യപ്പെടുത്തുക , അവയുടെ സംരക്ഷണത്തിനും പരിപാലനത്തിനുള്ള മാർഗങ്ങൾ കാര്യക്ഷമമായി നടപ്പിലാക്കുക എന്നീ ലക്ഷ്യങ്ങളോടു കൂടെയാണ് ദിനാചരണം സംഘടിപ്പിച്ചത്. വൈപ്പിൻ ബി ആർ സി യുടെ പരിധിയിൽ വരുന്ന കുഴുപ്പിള്ളി ബീച്ചിൽ കണ്ടൽ തൈകൾ നട്ടുകൊണ്ട് പഞ്ചായത്ത് പ്രസിഡൻറ് കെ എസ് നിബിൻ പരിപാടി ഉദ്ഘാടനം ചെയ്തു .
ജലാശയങ്ങൾക്ക് സമീപം കണ്ടൽ ചെടികൾ കൂടുതലായി നട്ടുവളർത്തുക വഴി മണ്ണൊലിപ്പ് കുറയുന്നതിനും തീരദേശ സംരക്ഷണം ഉറപ്പാക്കുന്നതിനും കഴിയും . കുഴുപ്പിള്ളി സെൻറ് ഗ്രിഗറീസ് യുപി സ്കൂളിലെ വിദ്യാർഥികളും അധ്യാപകരും പരിപാടിയിൽ പങ്കുചേർന്നു. കുഴുപ്പള്ളി ബീച്ചിനോട് ചേർന്ന് ഇടതിങ്ങി വളരുന്ന കണ്ടൽക്കാടുകൾ കാണാനും അവിടെയുള്ള സ്വാഭാവിക ആവാസ വ്യവസ്ഥ നിരീക്ഷിക്കാനും വിദ്യാർഥികൾക്ക് ഇതിലൂടെ അവസരം ലഭിച്ചു. കണ്ടൽ വനങ്ങൾ സംരക്ഷിക്കേണ്ടതിന്റെ ആവശ്യകതയും പ്രാധാന്യവും വിളിച്ചോതുന്ന പ്ലകാർഡുകൾ കുട്ടികൾ കൈകളിലേന്തിയത് മനോഹരമായ കാഴ്ചയായിരുന്നു . അധ്യാപകരും വിദ്യാർത്ഥികളും ജനപ്രതിനിധികളും ബി ആർ സി അംഗങ്ങളും കണ്ടൽ തൈകൾ നട്ടു കൊണ്ട് ദിനാചരണത്തിൽ പങ്കുചേർന്നു. കുഴുപ്പിള്ളി ഗ്രാമപഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ എം എം പ്രമുഖൻ അധ്യക്ഷത വഹിച്ച ചടങ്ങിൽ മെമ്പർമാരായ വിപിന അനീഷ്, കെ എസ് ചന്ദ്രൻ, സമഗ്ര ശിക്ഷാ കേരളം എറണാകുളം ജില്ലാ പ്രോജക്ട് കോഡിനേറ്റർ ബിനോയ് കെ ജോസഫ്, ജില്ലാ പ്രോഗ്രാം ഓഫീസർ ജോസഫ് വർഗീസ്, ബിപിസി പ്രീത കമ്മത്ത്, സെൻറ് ഗ്രിഗറിസ് യുപി സ്കൂൾ പ്രധാനാധ്യാപിക മീന കെ ജെ, ബി ആർ സി പരിശീലക പാരിജ ഫ്രാൻസി തുടങ്ങിയവർ നേതൃത്വം നൽകി.