എന്താണ് സേവാസ്   

സാമൂഹികമായും സാമ്പത്തികമായും പിന്നാക്കം നിൽക്കുന്ന മേഖലയിലെ വിദ്യാർത്ഥികളുടെ വിദ്യാഭ്യാസ മുന്നേറ്റത്തിനായി നടപ്പിലാക്കുന്ന പദ്ധതി. തീരദേശ മേഖല , അന്യ സംസ്ഥാന തൊഴിലാളി മേഖല ,തോട്ടം മേഖല ,ആദിവാസി- ഗോത്ര മേഖല തുടങ്ങിയ ഇടങ്ങളിലെ വിദ്യാർത്ഥികളുടെ അക്കാദമിക മുന്നേറ്റത്തിനുള്ള പിന്തുണ സംവിധാനമാണ് സേവാസ് (സെൽഫ് എമേർജിങ് വില്ലേജ് ത്രൂ അഡ്വാൻസ്ഡ് സപ്പോർട്ട്) എന്നത്. 14 ജില്ലയിലും തിരഞ്ഞെടുത്ത ഒരു ഗ്രാമപഞ്ചായത്തിലാണ് പൊതുവിദ്യാഭ്യാസ വകുപ്പിന്റെ നേതൃത്വത്തിൽ പദ്ധതി ആരംഭിക്കുന്നത് . ഈ മേഖലയിലെ സമഗ്ര വികസനം മുന്നിൽക്കണ്ട് സാധ്യമായ എല്ലാ ഏകോപന സാധ്യതകളും പ്രയോജനപ്പെടുത്തി ആ മേഖലയെ സേവാസിലൂടെ ദത്തെടുക്കുന്നതാണ് പദ്ധതി . പാർശ്വവൽക്കരിക്കപ്പെട്ട വിഭാഗങ്ങൾക്ക് ആത്മവിശ്വാസം നൽകി അവരെ മുന്നോട്ടു നയിക്കുക ,വിദ്യാഭ്യാസം ,സാംസ്കാരിക ബോധം , തൊഴിൽ തുടങ്ങിയ മേഖലകളിൽ മികവ് നേടാൻ സഹായിക്കുക , പൊതുവിദ്യാലയങ്ങളിൽ പഠിക്കുന്ന ഈ മേഖലയിലെ മുഴുവൻ കുട്ടികൾക്കും ഗുണനിലവാരമുള്ള വിദ്യാഭ്യാസം  സാമൂഹിക പങ്കാളിത്തത്തോടെ നടപ്പാക്കുക തുടങ്ങിയവയാണ് സേവാസ് -ന്റെ പ്രധാന ലക്ഷ്യങ്ങൾ. തദ്ദേശസ്വയംഭരണ വകുപ്പ് ,വനിത ശിശു വികസന വകുപ്പ്,  ആരോഗ്യ-സാമൂഹ്യ നീതി വകുപ്പ് ,  തീരദേശ വകുപ്പ്, പോലീസ് ,എക്സൈസ്, വനം ,തൊഴിൽ വകുപ്പുകളുടെ ഏകോപനം സാധ്യമാക്കിയാണ് പൊതുവിദ്യാഭ്യാസ വകുപ്പ് സേവാസ് പദ്ധതി നടപ്പിലാക്കുന്നത് . പട്ടികജാതി വിഭാഗങ്ങൾ കൂടുതലുള്ള  പഞ്ചായത്തുകൾക്ക് മുൻഗണന നൽകിയാണ് ആദ്യഘട്ടം എന്ന നിലയിൽ സേവാസ് ആരംഭിക്കുന്നത് . അവരുടെ പഠന മുന്നേറ്റത്തിന് പിന്തുണയും താമസസ്ഥലങ്ങൾ കേന്ദ്രീകരിച്ച് സാമൂഹികാവസ്ഥാ പഠനവും നടത്തും . ഇവിടങ്ങളിലെ കുട്ടികൾ  പഠിക്കുന്ന പൊതുവിദ്യാലയങ്ങളിൽ അക്കാദമിക വിദഗ്ധർ  പഠനം നടത്തി തയ്യാറാക്കുന്ന മാസ്റ്റർ പ്ലാൻ അനുസരിച്ചാകും  പൂർണ്ണമായും സേവാസ് നടപ്പാക്കുന്നത്.