നിലമ്പൂർ : പോത്തുകല്ല് പഞ്ചായത്തിലെ അപ്പൻകാപ്പ് പ്രദേശത്ത് താമസിക്കുന്ന  ഗൃഹാധിഷ്ഠിത വിദ്യാഭ്യാസം നേടുന്ന വിശ്വജിത്തിൻ്റെ വീട്ടിൽ പുൽക്കൂടും ക്രിസ്തുമസ് ട്രീയുമൊരുക്കി,കരോളും, മധുര പലഹാരങ്ങളും  കളികളും സമ്മാനങ്ങളുമായി ചങ്ങാതിക്കൂട്ടമെത്തി. പൂർണ്ണമായും കിടപ്പിലായ, ഗൃഹാധിഷ്ഠിത വിദ്യാഭ്യാസം ചെയ്തുവരുന്ന, കുട്ടികൾക്ക് ക്രിസ്തുമസ്, പുതുവത്സരാഘോഷങ്ങളുടെ നേരനുഭവങ്ങൾ നൽകുക,സഹപാഠികളുടെയും പൊതുസമൂഹത്തിൻ്റെയും പിന്തുണ ഉറപ്പു വരുത്തുക  എന്നീ ലക്ഷ്യങ്ങളോടെയാണ് സമഗ്ര ശിക്ഷാ കേരളം പദ്ധതി ആവിഷ്ക്കരിച്ച് നടപ്പിലാക്കുന്നത്. പോത്തുകല്ല് ഗ്രാമപഞ്ചായത്ത് ഭരണസമിതി അംഗങ്ങൾ, നിലമ്പൂർ ബി ആർ സി ജീവനക്കാർ, മുണ്ടേരി ഹൈസ്കൂൾ അധ്യാപകർ, സഹപാഠികൾ എന്നിവരുടെ നേതൃത്വത്തിൽ ചങ്ങാതിക്കൂട്ടം വിശ്വജിത്തിൻ്റെ വീട്ടിലെത്തി ആഘോഷം സംഘടിപ്പിക്കുകയായിരുന്നു. അപ്പൻകാപ്പ് നിവാസികളായ രാഹുൽ, രോഹിണി, ശ്രീരാജ് എന്നീ വിദ്യാർത്ഥികളുടെ വീടുകളിലും ചങ്ങാതിക്കൂട്ടത്തിൻ്റെ നേതൃത്വത്തിൽ കരോളും മധുര പലഹാര വിതരണവും നടന്നു. കുട്ടികൾക്ക് ക്രിസ്തുമസ് സമ്മാനം നൽകി വീണ്ടും വരാമെന്ന് വാഗ്ദാനം നൽകിയാണ് ചങ്ങാതിക്കൂട്ടം തിരിച്ചു പോന്നത്. നിലമ്പൂർ ബ്ലോക്ക് പ്രൊജക്റ്റ് കോ-ഓർഡിനേറ്റർ എം.മനോജ് കുമാർ അധ്യക്ഷനായ ചടങ്ങ് പോത്തുകല്ല് ഗ്രാമപഞ്ചായത്ത് വിദ്യാഭ്യാസ കാര്യ സ്ഥിരം സമിതി അധ്യക്ഷ റുബീന കിണറ്റിങ്ങൽ ഉദ്ഘാടനം ചെയ്തു. ക്ഷേമകാര്യ സ്ഥിരം സമിതി അധ്യക്ഷൻ എം.എ തോമസ്, വാർഡ് മെമ്പർ കവിത, മുണ്ടേരി ഗവ: ഹൈസ്ക്കൂൾ പ്രധാനാധ്യാപിക എം.ജെ സിസിലി എന്നിവർ ക്രിസ്തുമസ് പുതുവത്സര സന്ദേശങ്ങൾ നൽകി. സ്പെഷ്യൽ എഡ്യൂക്കേറ്റർമാരായ ദീപ ജോസ്, ഉമ്മുഹബീബ, അഞ്ജലി ജോസഫ്, സബിത്ത് ജോൺ, അഖില എന്നിവർ നേതൃത്വ നൽകി.