മലപ്പുറം:  ഒരു ദിനമേ ഉണ്ടായിരുന്നുവെങ്കിലും മലപ്പുറത്തുകാർ പ്രതിഭകളുടെ സർഗാത്മക കലാപ്രകടനങ്ങൾ ആവോളം ആസ്വദിച്ചു . പതിനാല്  ജില്ലകളിൽ നിന്നും എത്തിയ ഇരുനൂറ്റി അമ്പതോളം  കലാകാരന്മാരും കലാകാരികളും പ്രതിഭയുടെ പകർനാട്ട മൊരുക്കി പത്ത് സർഗ്ഗ വേദികളിൽ നിറഞ്ഞാടി . നാട്യശാസ്ത്ര ഭംഗി കൊണ്ട് നർത്തകരും , രാഗലയ ശ്രുതി തരംഗമുണർത്തി ഗായകരും 

കരവിരുതും സൗന്ദര്യശാസ്ത്ര  ഏടുകളും തീർത്ത് ചിത്രരചനക്കാരും,ശിൽപ്പികളും അരങ്ങിൽ പ്രതിഭകളുടെ മിന്നലാട്ടവും പകർനാട്ടവും നടത്തി. അടുത്തവർഷം ജനുവരി ആദ്യവാരം ഒഡിഷയിലെ ഭുവനേശ്വറിൽ നടക്കുന്ന ദേശീയ കലാഉത്സവിൽ മാറ്റുരയ്ക്കാൻ പത്തിനങ്ങളിൽ ആൺ- പെൺ വിഭാഗങ്ങളിലായി ഇരുപത് സർഗ്ഗ പ്രതിഭകളെയാണ് മലപ്പുറത്ത് ഇന്ന് സമാപിച്ച സംസ്ഥാനതല കലാ ഉത്സവ് കണ്ടെത്തിയിരിക്കുന്നത് . മലപ്പുറം കോട്ടപ്പടി ഗവ.ഗേൾസ് ഹയർ സെക്കൻഡറി സ്കൂൾ,  ഗവ. ബോയ്സ് ഹയർ സെക്കൻഡറി സ്കൂൾ ,ഗവ. എൽ പി സ്കൂൾ എന്നിവിടങ്ങളിലായിട്ടാണ് വേദികൾ തയ്യാറാക്കിയിരുന്നത് . പതിനാല് ജില്ലകളിൽ നിന്നുള്ള ജില്ലാതല വിജയികളെയാണ് സംസ്ഥാന തലത്തിൽ പങ്കെടുപ്പിച്ചത് . പെൺകുട്ടികളുടെ നൃത്തയിനങ്ങളിൽ (ശാസ്ത്രീയ വിഭാഗം ) കണ്ണൂർ ജില്ലയിൽ നിന്നുള്ള ദേവിക മഞ്ജിത്ത് ഒന്നാം സ്ഥാനം കരസ്ഥമാക്കി . ആൺകുട്ടികളുടെ ഇതേ വിഭാഗത്തിൽ തൃശ്ശൂർ ജില്ലയിലെ മാനസ് മഹേശ്വറിനും ഒന്നാം സ്ഥാനം ലഭിച്ചു .ആൺകുട്ടികളുടെ തദ്ദേശീയ പാവ നിർമ്മാണത്തിൽ പ്രിഭിൻ ടി (മലപ്പുറം ) ജുമാന തസ്നിം (മലപ്പുറം) ,ശാസ്ത്രീയ സംഗീതം (ആൺ) സഞ്ജയ് എ പി കണ്ണൂർ ,ശാസ്ത്രീയ സംഗീതം ഭാവപ്രിയ കെ എസ് (പാലക്കാട് ) , ഉപകരണ സംഗീതം തദ്ദേശീയം - (പറ ) ഗംഗാലക്ഷ്മി കെ സി , (കോട്ടയം )

ഉപകരണ സംഗീതം (തദ്ദേശീയം -ചെണ്ട) മാധവ് വിനോദ് (ആലപ്പുഴ ) 

ഉപകരണ സംഗീതം (ശാസ്ത്രീയം - വയലിൻ ) അന്നപൂർണ്ണി ജി, (പാലക്കാട് ) , ഉപകരണ  സംഗീതം (ശാസ്ത്രീയം - വയലിൻ )ദീക്ഷിത് വി ജി (പാലക്കാട് ) , പെൺകുട്ടികളുടെ നാടോടി നൃത്തത്തിൽ  ആദിത്യ രാജു (കോട്ടയം) ആൺ കുട്ടികളുടെ വിഭാഗത്തിൽ മണി പി (കോഴിക്കോട് )  ആൺകുട്ടികളുടെ എകപാത്ര നാടകത്തിൽ  അഭിനവ് ആർ കുറുപ്പ് (തിരുവനന്തപുരം ), ഐറിൻ തെരേസ പ്രകാശ് പെൺകുട്ടി (ആലപ്പുഴ ) എന്നിവർ ഒന്നാം സ്ഥാനങ്ങൾ നേടി. നാടൻപാട്ട് മത്സരം തദ്ദേശീയം ആൽഫി കെ ബിജു (തൃശ്ശൂർ ),  പെൺകുട്ടികളുടെ വിഭാഗത്തിൽ ആലിയ എൻ കെ (എറണാകുളം) ചിത്രരചന (പെൺ) സയാന ടി പി കണ്ണൂർ , ആൺകുട്ടികൾ അദ്വൈത് പി പി (കണ്ണൂർ) ശില്പനിർമ്മാണത്തിൽ നിള കെ.എസ് (ആലപ്പുഴ) ആൺകുട്ടികളുടെ ശില്പ നിർമ്മാണത്തിൽ കാരോൾ ജോസ് (ഇടുക്കി) തുടങ്ങിയവർ ഒന്നാം സ്ഥാനങ്ങൾ കരസ്ഥമാക്കി . ഗവ. ഗേൾസ് ഹയർ സെക്കൻഡറി സ്കൂളിൽ നടന്ന ഉദ്ഘാടന ചടങ്ങിൽ മലപ്പുറം എംഎൽഎ പി .ഉബൈദുള്ള കലാ ഉത്സവ് ഉദ്ഘാടനം ചെയ്തു .മലപ്പുറം ഡി പി സി രത്നാകരൻ ടി. സ്വാഗതം ആശംസിച്ച ചടങ്ങിൽ സമഗ്ര ശിക്ഷ കേരളം അഡീ. ഡയറക്ടർ ഷിബു ആർ എസ് കലാഉത്സവ് പരിപാടി വിശദീകരിച്ചു . മലപ്പുറം ജില്ലാ പഞ്ചായത്ത് , നഗരസഭ എന്നിവിടങ്ങളിലെ ജനപ്രതിനിധികൾ സന്നിഹിതരായിരുന്നു.  സമഗ്ര ശിക്ഷ കേരളയുടെയും പൊതുവിദ്യാഭ്യാസ വകുപ്പിലെയും ഉന്നത ഉദ്യോഗസ്ഥർ രക്ഷിതാക്കൾ വിവിധ വിദ്യാലയങ്ങളിലെ വിദ്യാർത്ഥികൾ തുടങ്ങിയവർ പങ്കെടുത്തു. വിജയികൾക്കുള്ള സമ്മാനദാനവും പൂർത്തിയായി . മികച്ച സംഘാടനം കൊണ്ടും മികവാർന്ന അവതരണങ്ങൾ കൊണ്ടും കലാ ഉത്സവ് പൂർണ്ണ വിജയത്തിലെത്തിക്കാൻ കഴിഞ്ഞ മലപ്പുറം ജില്ലയിലെ സമഗ്ര ശിക്ഷ കേരളയുടെയും പൊതു വിദ്യാഭ്യാസ വകുപ്പിലെയും അംഗങ്ങളെയും സമഗ്ര ശിക്ഷ കേരളം ഡയറക്ടർ ഡോ. എ ആർ സുപ്രിയ അഭിനന്ദിച്ചു.