കാസർഗോഡ് : കലാപാഠ്യപദ്ധതി പുതിയ കാഴ്ചപാടിലൂടെ പരിശോധിക്കുന്നതിനും ബൗദ്ധിക വികാസത്തിൽ കലാപഠനത്തിൽ ഉള്ള സ്വാധീനം തിരിച്ചറിയുന്നതിനും വേണ്ടി സമഗ്ര ശിക്ഷാ കേരളയുടെ നേതൃത്വത്തിൽ  കലാ അധ്യാപകർക്കായി  മൂന്ന് ദിവസത്തെ പരിശീലനത്തിന് തുടക്കം കുറിച്ചു. പഠനം ആഹ്ളാദാന്തരീക്ഷത്തിൽ     പുതുഅനുഭവമാക്കി  മാറ്റുന്നതിനും , കലാപഠന പ്രവർത്തനങ്ങളുടെ പഠനതന്ത്രങ്ങൾ നിർമ്മിക്കുന്നതിനുള്ള സിദ്ധി വികസിപ്പിച്ചെടുക്കലുമാണ് പരിശീലനത്തിലൂടെ ലക്ഷ്യമിടുന്നത്. പൊതുവിദ്യാഭ്യാസ വകുപ്പിലെയും സമഗ്ര ശിക്ഷയിലേയും  കണ്ണൂർ കാസർഗോഡ് ജില്ലകളിലെ കലാ അധ്യാപകർക്കുള്ള  റീജണൽ റെസിഡ്യൻഷ്യൻ പരിശീലനമാണ് കൊടക്കാട് കദളീവനത്തിൽ തുടക്കമായത്. ചിത്രകല, സംഗീതം, നൃത്തം, നാടകം, എന്നീ കലാ മേഖലകളിൽ ആഴത്തിലുള്ളതും അനുഭവാധിഷ്ഠിതവുമായ പരിശീലനമാണ് നൽകുന്നത്. കലാ പഠനത്തിൽ ആധുനിക ഡിജിറ്റൽ സാങ്കേതിക വിദ്യയുടെ സാധ്യതകളും പരിശീലനത്തിൽ പരിചയപ്പെടുത്തും. പരിശീലനപരിപാടി പിലിക്കോട് ഗ്രാമപഞ്ചായത്ത് പ്രസിഡന്റ് പി പി പ്രസന്നകുമാരി ഉദ്ഘാടനം ചെയ്തു. ജില്ലാ പ്രോഗ്രാം ഓഫീസർ എം.എം മധുസൂദനൻ , ഈശ്വരൻ നമ്പൂതിരി , അരവിന്ദാക്ഷൻ, ഉപേന്ദ്രൻ ചിറ്റാരിക്കൽ എന്നിവർ സംസാരിച്ചു.