സംസ്ഥാന സ്പെഷ്യൽ സ്കൂൾ കലോത്സവത്തിൽ മിന്നും താരമായി കൃഷ്ണപ്രസാദ്.
കൊല്ലം (കരുനാഗപ്പള്ളി ബി ആർ സി ):ബേക്കൽ മെമ്മോറിയൽ ഹയർ സെക്കൻഡറി സ്കൂളിൽ (കോട്ടയം)നടന്ന സംസ്ഥാന സ്പെഷ്യൽ സ്കൂൾ കലോത്സവത്തിൽ മിന്നും പ്രകടനം കാഴ്ചവെച്ച് താരമായി മാറിയിരിക്കുകയാണ് കരുനാഗപ്പള്ളി തഴവ ആദിത്യ വിലാസം ഗവൺമെന്റ് ഹൈസ്കൂളിലെ ഏഴാം ക്ലാസ്സ് വിദ്യാർത്ഥിയായ കൃഷ്ണപ്രസാദ്. ജന്മനായുള്ള കാഴ്ച പരിമിതിയെ തന്റെ കഴിവുകളിലൂടെ അതിജീവിച്ച കൃഷ്ണപ്രസാദ് അതിമനോഹരമായ ഹാസ്യാനുകരണത്തിലൂടെ സദസ്സിനെ പൊട്ടി ചിരിപ്പിച്ചുകൊണ്ട് മിമിക്രിയിൽ ഒന്നാം സ്ഥാനം കരസ്ഥമാക്കി.ലളിത ഗാനത്തിലും ഉപകരണ സംഗീതത്തിലും എ ഗ്രേഡും നേടി കാണികളുടെ പ്രശംസ ഏറ്റുവാങ്ങിയ ഈ കൊച്ചു കലാകാരൻ ചവറ ശങ്കരമംഗലം ഗവൺമെന്റ് ഹയർ സെക്കൻഡറി സ്കൂൾ അധ്യാപകനായ കാഴ്ചാപരിമിതിയുള്ള സുഗുണന്റെയും ജയലക്ഷ്മിയുടെയും മകനാണ്.അച്ഛൻ തന്നെയാണ് ഈ കൊച്ചു കലാകാരന്റെ ഗുരു.