പൊതുവിദ്യാഭ്യാസ വകുപ്പ് -സമഗ്ര ശിക്ഷ കേരളയുടെ നേതൃത്വത്തിൽ സംസ്ഥാനത്തെ പൊതുവിദ്യാലയങ്ങളിൽ നിന്ന് കൂടുതൽ  അധ്യാപകരെ ശാസ്ത്രീയമായി ഐടി അധിഷ്ഠിത വിദഗ്ധരാക്കുന്നതിനുള്ള 'ദി ടെക്കി ടീച്ചർ പരിശീലന പദ്ധതിക്ക് തുടക്കം കുറിക്കുന്നു . വർത്തമാനകാലത്തെ പഠന പഠനേതര പ്രവർത്തനങ്ങൾക്ക് അധ്യാപകരിൽ ഐസിടി അധിഷ്ഠിത വിദ്യാഭ്യാസം അനിവാര്യമാണെന്നും, ഹൈടെക് ഉപകരണങ്ങളുടെ ഉപയോഗത്തിൽ കാലികമായി വന്നിട്ടുള്ള നവീകരണങ്ങൾ കൂടി ഉൾക്കൊള്ളുന്ന  തരത്തിലാണ് ടെക്കി ടീച്ചർ പദ്ധതി നടപ്പിലാക്കുന്നത്. പ്രൈമറി ,സെക്കൻഡറി , വൊക്കേഷണൽ ഹയർസെക്കൻഡറി തലത്തിലെ ഓരോ വിദ്യാലയത്തിൽ നിന്നും ഓരോ അധ്യാപകർക്ക് എങ്കിലും പരിശീലനം ലഭ്യമാക്കുകയാണ് പദ്ധതിയുടെ ലക്ഷ്യം . ഐടി വിദ്യാഭ്യാസ സമീപനം , ഹൈടെക് ഉപകരണങ്ങളുടെ ഉപയോഗവും പരിപാലനവും , ഡിജിറ്റൽ പാഠഭാഗങ്ങൾ വികസിപ്പിക്കൽ, ഐടി മേഖലയിലെ നവീന സാങ്കേതികത്വം , ഡെലിവറി മോഡ് - മോണിറ്ററിംഗിലും ഹോം പ്രവർത്തനങ്ങളിലും സാങ്കേതികവിദ്യയുടെ ഡിജിറ്റൽ  ഉപയോഗം തുടങ്ങി ആധുനിക ഡിജിറ്റൽ  സാങ്കേതികതയിലൂന്നിയുള്ള പരിശീലനമാണ് അധ്യാപകർക്ക്  ലഭ്യമാകുന്നത്.  സ്റ്റാർസ് പദ്ധതിയിൽ ഉൾപ്പെടുത്തി സമഗ്ര ശിക്ഷ കേരളമാണ് പരിശീലനങ്ങളുടെ സംസ്ഥാന തലത്തിൽ ക്രമീകരണം നിർവഹിക്കുന്നത്.   എസ്.ആർ ജി , ഡിആർ ജി പരിശീലനം സമയബന്ധിതമായി പൂർത്തിയാക്കുകയും ഇതിൽ നിന്നും   പരിശീലനം ലഭിച്ച സ്കൂൾ ഐടി കോഡിനേറ്റർമാർ തങ്ങളുടെ സ്കൂളിലെ അധ്യാപകർക്ക് പരിശീലനം നൽകുകയും ചെയ്യും. പദ്ധതിയുടെ ആദ്യഘട്ടത്തിൽ ഓരോ തലത്തിലേയും അധ്യാപകരിലും  തുടർന്ന് മുഴുവൻ അധ്യാപകർക്കും പരിശീലനം ലഭ്യമാക്കുന്ന  തരത്തിലാണ് തുടർ പരിശീലനങ്ങൾ സ്കൂൾ തലങ്ങളിൽ കോർഡിനേറ്റർമാർ വഴിയാകും  നടപ്പിലാക്കുക . പരിശീലനത്തിന് ആവശ്യമായ മോഡ്യൂളും പരിശീലന സാമഗ്രികളും കൈറ്റ് തയ്യാറാക്കും. പൊതുവിദ്യാഭ്യാസ വകുപ്പിന്റെ ഐടി അധിഷ്ഠിത വിദ്യാഭ്യാസ നയത്തിന്റെ അടിസ്ഥാനത്തിൽ തയ്യാറാക്കിയിരിക്കുന്ന 'ദി ടെക്കി ടീച്ചർ ' പരിശീലന പദ്ധതി നടപ്പാക്കുന്നതോടെ പൊതുവിദ്യാലയങ്ങളിലെ അക്കാദമിക പ്രവർത്തനങ്ങൾക്ക് കൂടുതൽ ദൃഢത കൈവരിക്കാൻ കഴിയും.