കൊച്ചി‌: ചുവരിൽ നിറയെ ചിത്രങ്ങൾ, നിരവധി കളിപ്പാട്ടങ്ങൾ, മനോഹരമായ ഇരിപ്പിടം, മുറ്റത്ത് കുഞ്ഞൻ പാർക്ക്, പൂന്തോട്ടത്തിൽ കൃത്രിമ വെള്ളച്ചാട്ടം... നഴ്സറി സ്കൂളിലെ കാഴ്ചകൾ കണ്ട് രക്ഷിതാക്കൾ അമ്പരക്കുമ്പോൾ കളിപ്പാട്ടങ്ങളോട് കൂട്ടുകൂടുകയാണ് കുരുന്നുകൾ. ജില്ലയിലെ ആദ്യത്തെ മാതൃക പ്രീ സ്കൂളായ ​തൃപ്പൂണിത്തുറ ​ഗവ. മോഡൽ നഴ്സറി സ്കൂളാണ്‌ അമ്പരപ്പിനും കൗതുകത്തിനും വേദിയാകുന്നത്‌. ക്ലാസ് മുറികളിൽ കയറിയിറങ്ങിയും ചുവരിലെ ഇഷ്ടകഥാപാത്രങ്ങളോട് കിന്നാരംപറഞ്ഞും കളിയുപകരണങ്ങളിൽ കയറിയിരുന്നും പാർക്കിൽ കളിച്ചും കുരുന്നുകൾ സന്തോഷമറിയിച്ചു.സമ​ഗ്രശിക്ഷ കേരളത്തിന്റെ ഫണ്ട്‌ ഉപയോ​ഗിച്ചാണ്‌ തൃപ്പൂണിത്തുറ ​ഗവ. നഴ്സറി സ്കൂൾ അന്താരാഷ്ട്ര നിലവാരത്തിലേക്ക്‌ ഉയർത്തിയതും സൗകര്യങ്ങൾ മെച്ചപ്പെടുത്തിയതും. തൃപ്പൂണിത്തുറ ​ഗവ. ​ഗേൾസ് ഹയർസെക്കൻഡറി സ്കൂൾവളപ്പിൽ കിഫ്ബി ഫണ്ട് ഉപയോ​ഗിച്ച് നിർമിച്ച കെട്ടിടത്തിലാണ് നഴ്സറി സ്കൂൾ പ്രവർത്തിക്കുന്നത്.കുട്ടികൾക്ക്‌ ഭക്ഷണമൊരുക്കാനും മറ്റും പ്രത്യേക സംവിധാനങ്ങൾ സ്കൂളിൽ ഒരുക്കിയിട്ടുണ്ട്. കളിച്ചു പഠിക്കുകയെന്നതാണ്‌ ലക്ഷ്യം. ഒരു ക്ലാസിൽ 50 കുട്ടികൾക്കുവരെ ഇരിക്കാം. ഡിജിറ്റൽ ക്ലാസ് മുറിയുടെ നിർമാണം പുരോ​ഗമിക്കുന്നു. അടുത്ത അധ്യയനവർഷം സ്കൂൾ തുറക്കുന്നതിനുമുമ്പ്‌ ഇത് പൂർത്തിയാകും.